Da Schani

Neilich foa i uma viere mit da Strossnbahn
De Hatscherei is sowieso a Wahn
Do sitzt a klana Bua auf an großn Sitz
des deaf do net woa sein, des is a Witz.
Dea Lümmel springt net auf sofuat
I glaub, dem flüsta i amoi a Wuat

Oiso sog i: 'Kumm scho Biaschal, kane Tanz
Du stehst jetzt auf, wöll i sog da ans
Es Jungen sad's jo so vül g'scheit,
Owa sitzn tan de oidn Leit.'
Und wia a Hoftlmocha laua i,
Daß diesa Schmuftla loßt mi hin

Des Biaschal schaut mi goanet on
Und knozt no weita in da Straßnbahn
Da steh i, ongfressn, mit da Wölt jetzt barre
Wöl i loß mi do net ein auf a Larifari
Ixkjus mi, sorri, bitte sehr
Do hintn wiad jo grod a Platzal lea

I schmeiß mi auf den Sitz, daß krocht
Do kummt a Blinda, no donn guate Nocht
Marantana, aussischaun.
I hoff, de sogn nix, de Fraun
In dem Moment lahnt si de ane umma ..
"Gehn's, dea Hea steht auf, do her kennans kumma"

"I steig jo eh scho aus, oiso kummans hea
Es bressiat ma sowieso net sea"
In da Station schau i ma olle Leite an
A Madl mit ihrn Hund hots ma besondas angetan
Was macht des klane Madl mit den großn Hund
A feine Remassuri um de Stund

Endlich bin i bei da Tant
In ihra Bassenawohnung muffelts penetrant
Des is a Grontscheabm meina Söll
- Gimma dei Göd und foa zua Höll
De oide Fuchtl modschgat wia a Wedl
"Oiwoi scheißn ma de Taubn auf mei Fenstabrettl"

Und wann sa se so einiraunzn tuat,
Dann wass i, jetzt beginnt da Obndspuat
Lompn tauschn, mit den Kühlschronk plogn
Kolloniakiwln owitrogn
In Koksofn ostian
Fia so an Schani haßts parian.

Zum Woschn gib i mei weißes Hemd
A Stindal späta is es Bodezimma iwaschwemmt
Oiso reparia ma de Pawlatschn
De Spinodwochtl tuat in ana Tua gatschn
I biaß fia ollas, i woitat gern gehn
I kumm ja eh nimma zum Feansehn

Endlich bin i featig mit den Zinnowa
I hoit des nimma aus, i wea an bowln
"Du vastinkst ma nua mei Zimma, loß des sein"
Oisa guat, i stöll des Rauchn ein
I hob ihr no an Schrauwnziaga gstessn
Und jetzt wiad amoi uandlich gfressn

Dann gibts noch a pinke-pinke
Und dann sog i winke-winke
"I donk da, Bua, vagelts da Gott,
Ma is so oam, wann ma kan Mensch hot"
Wos, wos, de gibt ma goa kan Schülling
Des is bei Gott wiaklich büllig

Wann des so is, hätt i ihr wos gstoin
Von wos soll i mei Viadl zoin?
Jedesmoi de gleiche Woizn
Nächstens wia i ihr ane schnoizn
Owa na, des Göd, wos i donn eab
Is de Oide amoi untad Ead

Oiso bin i weitahin da Schani
Ana muaß des mochn, man i
Ana muaß da Schani sein
Ruafts mi on, i sog net "nein"
Fia olle melne Sindn howi biaßt
Oiso "Prost" und sads ma griaßt!

© Henk Freytag

Startseite - Wien - Fotos - Musik - Reisetipps - Tours - Donaufahrt - Kaffeehaus - Heuriger/Wein - Links - Suchen - Impressum