Eines Morgens

Ticke-tacke-ticke-tacke
Zicke-zacke-zicke-zacke
Wo hob i de Schlapfn glossn
Gestan meinem Hund nochgscnossn
Mistviech woit no Gassi gehn
I woa so blau, kunnt nimma stehn

Die Augn klan, da Schlof is groß
In olla Heagottsfrua gehts los
Da Wecka ratscht und i spring auf
Aufs Heisl gehts im Daualauf
Die Spülung hängt, na is ma wuascht
Jedenfois hob i an Duascht

Uijegale, do kribbelts mich
De Muskln spannen fiachtalich
I wolz mi auf, - na, schenen Gruaß
No dazua mitn linken Fuaß
In mein Pantoffl is a Stan
A Malheur kummt net alan

Hoibat blind in olla Frua
Foll i eini ins Lawua
Des mocht an Plumpsa, i kröll auf
De Katastrophe nimmt ihrn Lauf
Mei Engal hüft ma net bei dera Plog
Wia ma so im Voiksmund sogt

I greif hin zum Radio
I steck eam ein, mi beidlts no
Dann hea i a Marschmusik
Und siech mit mein Adlerblick
Mei Voiksempfänga is vadraht
Des Umtata is mia zu fad

"Guten Morgen ohne Sorgen
Gleich das Wetter, liebe Höra
Bissal kühl an diesem Morgen.
Namenstag ham Hans und Vera"
Wanns so schiach is gfreits mi net
I krabbl wieda zruck ins Bett

"Ich erteile nun das Wort
Dem jungen Mann vom Morgensport:
Die linke Hand, des rechte Ban
Liegestütz und ans und zwa
De Schuitan hintre voa den Fuß
Und jetzt wippen, dann is Schluß"

Sekkiererei allgegenwärtig
Hauptsoch, da Kaffee is featig!
Jetztn schauri unscheniat.
Was da Kühlschronk offariat
I find a lares Püsnakriagal
Und a gföldes Hendlbiagal

Meine Hoa san net frisiat
Die Beißachen san net poliat
Beaugenscheinig mi amoi
Von obm bis untn ohne Schoin
Im schuppenhoabestäubten Spiegl
Gemmas on, des Schniegl-striegl

Jessas, bei de fuffzehn oltn
Kummt a neiche klane Foitn
Und da Boat steht kreiz und quer
A Noßrasur muaß schleinigst her
Mei schlankes Gsicht is a Quadrat
Und's Bobschal is hoit a scho blad

In Frnak schneizn, Göd einsteckn
Anzug steht duat in da Eckn
Quadratlatschn soin des sein
In zehnmoi gstopfte Sockn rein
I woa amoi a schlonka Bua
Doch jetzt geht kaum de Hosn zua

"Der Strassenzustand war um sieben
Je nach Niedaschlag vaschieden
Bei Regen feucht, bei Glatteis glatt
Vakeasaufkommen in da Stadt
Stockungen in jeda Street
Und überhaupt im ganzen Stadtgebiet"

No seawas, des is a Bescherung
Sicha kummt heit a Belehrung
Von mein Chef, dea guat zuaredt
Seit an Joa kumm i täglich zspät.
Betroppezt lan i in da Bim
De Hockn is in Simmaring

Eng is und de Leit san oag
A Voiksschuifrozz fühlt si so stoak
Dea rüttelt a am Watschnbaum
A Tschinöln und dea wiad schaun
Donn pickt a kane Kaugummi
Zum Nochban auf de Toschn ummi

Bauxerl woins no einefuzln
Gfüde wüll si aussiwuzln
Bißguan hot de Hoa tuabiat
Des böcklt, daß ma ondas wiad
Plötzlich steht ois mit an Stessa
Des bewegn net zehn Rössa

Knacka mit sonora Stimm
Pudlt si auf in da Bim
Pregnant schliaß i aus sein Schargon
Heanoisa Tölli in Person
Da Schoffna gibt uns zu vastehn
A Disasta is do gschehn

A Tschesngfrast hot unscheniat
An Fiaka kollidiat
Do wiast narrisch mit de Striezi
Fünf Minuten späta sitz i
In an Bus vom Bundeshea:
Strassenbahnersatzverkehr.

Do konnst nua a Schnofal ziagn
Und de Zeit so owabiagn
Ah, mei Nochba hot a Zeitung
Oiso lautet mei Entscheidung
Speanzl ma a wengal hin
So a Pech, des is zyrill

Do is de Fiama, de Kollegen
Schaun mi an, i waß weswegen
Dicke Luft, do is wos los
Und siabmsiasslat kummt da Boß
Und wia de olle fiebrig schaun
De wean mi do net aussihaun

Lieba Chef, ich wollt mich sputen
Tut mir leid um die Minuten
"Ich bin platt, da schau ich dumm
De Summazeit woa gestan um
Se san pünktlich, wos mi gfreit"
Des passiat zua Summazeit
Doch nicht im Winta, wenn es schneit...

© Henk Freytag

Startseite - Wien - Fotos - Musik - Reisetipps - Tours - Donaufahrt - Kaffeehaus - Heuriger/Wein - Links - Suchen - Impressum